ابني الغائب

الابن الغائب حبيبي مالك مجافينا طولت الغيبة من عينينا مكالمة هاتف ما بتكفينا ولا بتزيل قلقنا الفينا سعادتنا لامن تعود لينا حبيبي نحن ما هدفنا انك تجيب لينا مال الدنيا كله ما بسوى وجودك بينا بنخاف عليك من حفيف النسمة الحنينه والبشوفه القلب ان شاء الله ما تشوفو عينينا قلقنا عليك يصابحنا ويماسينا وهمنا عليك يصاحب كل ليالينا ووحاتك اللقمة في بعادك ما بتهنينا عارفنك انت كمان عاوز السمح لينا وشايل الهم فوق راسك عشان تدينا بتعمل المستحيل عشان بس ترضينا ونحن راضين بقسمة رب العباد فينا بس تعال انت ونور دياجينا ما فضل من العمر حبيبي ما بكفينا عشان تسافر وتبعد تخلينا ما تشقى بعيد مننا وتشقينا شوفتك والله من الهموم تشفينا تعال حبيبي وكون قريب لينا ما يجيك خبرنا في غفلة وانت ناسينا وتندم عمرك الباقي انك مجافينا